دل کی صحت کیلئے رات کے کھانے کا بہترین وقت کونسا ہے؟ اہم انکشاف

امریکی تحقیق کے مطابق سونے سے کم از کم 3 گھنٹے پہلے رات کا کھانا کھانے سے دل، بلڈ پریشر، شوگر لیول اور میٹابولزم بہتر ہوتا ہے۔ تحقیق میں شامل افراد میں رات کے وقت بلڈ پریشر اور دل کی دھڑکن میں کمی دیکھی گئی، جو دل کی صحت کیلئے مثبت قرار دی گئی۔

رات کو کھانا کس وقت کھایا جائے تاکہ دل اور میٹابولک صحت بہتر رہے؟ اس سوال کا جواب امریکا کی معروف درسگاہ Northwestern University کی ایک نئی طبی تحقیق میں سامنے آیا ہے۔

تحقیق کے مطابق درمیانی عمر کے افراد میں دل اور میٹابولک امراض کا خطرہ اس وقت بڑھ جاتا ہے جب وہ سونے سے کچھ دیر قبل کھانا کھاتے ہیں۔

ماہرین کا کہنا ہے کہ سونے سے کم از کم 3 گھنٹے پہلے رات کا کھانا کھانا دل، میٹابولزم اور نیند کی صحت کیلئے زیادہ فائدہ مند ہے۔

محققین کے مطابق رات بھر کے وقفے (اوور نائٹ فاسٹنگ) سے جسم کی اندرونی حیاتیاتی گھڑی بہتر انداز میں کام کرتی ہے، جس کے مثبت اثرات دل، بلڈ پریشر اور شوگر لیول پر مرتب ہوتے ہیں۔

ساڑھے 7 ہفتے جاری رہنے والی تحقیق میں 36 سے 75 سال کی عمر کے 39 ایسے افراد کو شامل کیا گیا جو زائد وزن یا موٹاپے کا شکار تھے۔

نتائج سے معلوم ہوا کہ سونے اور کھانے کے درمیان 3 گھنٹے کا وقفہ رکھنے سے:

رات کے وقت بلڈ پریشر میں تقریباً 3.5 فیصد کمی

دل کی دھڑکن کی رفتار میں 5 فیصد کمی

دن کے وقت بلڈ شوگر لیول میں بہتری

لبلبے کے افعال میں مؤثر کارکردگی

تحقیق میں شامل 90 فیصد افراد نے طے شدہ وقت پر کھانا کھانے کی عادت اپنائی تو ان کی مجموعی دل اور میٹابولک صحت میں نمایاں بہتری دیکھی گئی۔

ماہرین کا کہنا ہے کہ صرف کھانے کی مقدار ہی اہم نہیں بلکہ کھانے کا وقت بھی صحت پر گہرے اثرات مرتب کرتا ہے۔

from صحت https://ift.tt/Q4sydNc